Jeton Salihu, i cili kandidon si i pavarur për postin e kryetarit të Vushtrrisë, ka kritikuar qeverisjen aktuale në këtë komunë duke paraqitur disa fotografi ku pretendon se administrata e kësaj komune “noton” nëpër ujë.

Tutje, Salihu tha se përkundër që administrata e kësaj komune “noton” nëpër ujë, qytetarët e Vushtrrisë problem kryesor e kanë ujin e pijes e kanalizimet.

“Problemi kryesor në Vushtrri është uji, kanalizimet, udhëkryqi në fshatin Studime, Begaj dhe rruga “Shote Galica” të cilat paraqesin rrezik potencial për jetën e njerëzve”, është shprehur Salihu, në “Edicioni Zgjedhor” në Klan Kosova.

Salihu, si datë përfundimtare për përfundimin e projektit të ujit të pijes e ka dhënë fundin e vitit 2022, duke thënë se atëherë do të jetë koha kur përfundimisht secila familje do të ketë qasje në ujë të pijshëm.

Sa i përket shëndetësisë, Salihu thotë se prioritet në këtë fushë do të jetë menaxhimi i pandemisë.

Kurse, sa i përket balotazhit, Salihu thotë se nuk ka kandidat në Vushtrri që do të fitoj pa balotazh, teksa thotë se gjasat i kanë të gjithë të barabarta.